Алкоголизем
Треца хорота на швеце по смертельносци - после кардиоваскуларних хоротох (хоротох шерца и кревових судзинох) и малиґних хоротох (рака). Хорота котра нє вибера анї пол, анї доб, анї професию.
Алкоголизем то порок - гваря моралисти.
Одредзени норми у єдним друштве хтори поставени одредзую же як ше маме справовац и кед ше дахто нє справує по тих нормох тот вискакує зос своїм спаравованьом и на тот способ потупює тоти поставени норми. То цошка цо нє дозволєне, нє нормалне и нє моралне.
Алкоголизем то проблем - бо наисце виволує проблеми у фамелиї, на роботи и у ширшим друштвеним штредку.
З длугшим пиєньом чловек меня свой характер и здобува так волане алкоголичарске справованє. Ту наставаю и други пременки хтори спричинюю тото же алкоголичар прави зос своїм справованьом проблеми и у фамелиї и у ширшим друштвеним окруженю(проблеми манифестовани зос нєзаинтересованосцу за тото цо ше збува у фамелиї, на роботним месце, проблеми вязани зос нєпочитованьом авторитетох и друге).
Алкоголизем то ганьба - бо ше за алкоголичара ганьбя його найблїзши.
Пре уж спомнути пременки у справованю алкоголичар зос своїм нєодмераним и нєприкладним справованьом пороби и таке цо би нїґда у других околносцох нє поробел. Обично то поступки котри нє можу служиц анї на чесц а анї су нє у складу з пристойносцу та тото виходзи на ганьбу и йому и його найблїзшим.
Алкоголизем табу тема - тема о хторей ше нє дзечнє приповеда бо ю нє досц познаме.
Шицко тото спричинює же ше о алкоголизме нє дзечнє приповеда. Пробує ше шицко коло того прикриц и приказац же шицко у фамелиї и индзей шицко у порядку гоч шицким у окруженю ясне же нїч у алкоголичаровим окруженю нє функционує. Прето алкоголизем тема о хторей ше нє дзечнє приповеда - табу тема, цо спричинює тирванє алкоголизма и доживотно.
Алкоголизем то хорота - бо алкогол спричинює вельки пременки у орґанизму хтори, подобно другим пременком, виволую хороту.
Жеби алкогализем нє бул цошка о чим нє мож приповедац пре нєзнанє, же би нє бул табу тема - треба го научиц